នាល្ងាចថ្ងៃទី២៦ ខែវិច្ឆិកា ឆ្នាំ២០២៣ គណៈប្រតិភូសភាកម្ពុជា ដឹកនាំដោយឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភានៃព្រះរាជាណាចក្រកម្ពុជា ចូលរួមកិច្ចប្រជុំប្រចាំឆ្នាំនៃវេទិកាសភាអាស៊ី-ប៉ាស៊ីហ្វិកលើកទី៣១ (APPF-31) ក្រោមមូលបទ “ភាពជាដៃគូមានភាពធន់ ដើម្បីសន្តិភាព វិបុលភាព និងនិរន្តរភាព” នៅទីក្រុងម៉ានីល សាធារណរដ្ឋហ្វីលីពីន ពីថ្ងៃទី២៣ ដល់ថ្ងៃទី២៦ ខែវិច្ឆិកា ឆ្នាំ២០២៣ បានបញ្ចប់ដោយរលូន និងជោគជ័យ។ សូមជម្រាបថា គណៈប្រតិភូសភាកម្ពុជាមានសមាសភាពជាសមាជិកព្រឹទ្ធសភាកម្ពុជា រួមមាន ឯកឧត្តម ឈិត គឹមយាត អនុប្រធានគណៈកម្មការទី៥ ព្រឹទ្ធសភា និងលោកជំទាវ មុំ សណ្តាប់ លេខាធិការគណៈកម្មការទី៨ ព្រឹទ្ធសភា។
ជាលទ្ធផល សេចក្ដីសម្រេចស្នើឡើងសរុបចំនួន៣៧ ត្រូវបានអង្គវេទិកាបញ្ចូលគ្នា និងអនុម័តចំនួន១០។ ក្នុងនោះសភាកម្ពុជាបានចូលរួមចំណែក នៅក្នុងសេចក្តីព្រាងសេចក្តីសម្រេចចំនួន៥ ដែលគ្របដណ្ដប់លើវិស័យ នយោបាយ សន្តិសុខ សេដ្ឋកិច្ច វប្បធម៌ សមាជិកសភាស្រ្តី និងសមាជិកសភាវ័យក្មេង។
គណៈប្រតិភូសភាកម្ពុជាបានធ្វើដំណើរមកដល់ព្រះរាជាណាចក្រកម្ពុជាវិញ នាល្ងាចថ្ងៃទី២៦ ខែវិច្ឆិកា ឆ្នាំ២០២៣ ប្រកបដោយសុវត្ថិភាព។

ប្រភព៖ នាយកដ្ឋានទំនាក់ទំនងអន្តរជាតិ
សម្រួលខ្លឹមសារ៖ នាយកដ្ឋានព័ត៌មាន